經過兩個幾月嘅準備,呢個星期終於入台。由大家初次見面相敬如賓,之後開始講吓笑話,再到互相串吓大家,到最後大家主要係串我,成日要求導演可唔可以換咗個音樂總監,我視呢一種關係為信任,而我認為一個好睇嘅表演,台上各人之間嘅信任係不可或缺。 本來滿心期待同大家一齊入台感受,但偏偏就喺入台前中omicron,一直都係抱與病毒共存嘅態度生活,之前好奇點解咁耐都無中到,好啦,宜家中咗,我更加好奇點解偏偏係呢個時候中,雖然我真係十級唔開心,不過好彩嘅係,及早發現無傳染到俾演員,同埋有兩位值得信賴嘅拍檔。 聽日就係正式演出,劇中所有過場音樂同背景音樂都係用心去設計,而我覺得最興奮嘅就係喺好似唔太重要嘅位置落心機,偷偷地為大家最深處嘅情感先種下一粒種子, @lint.jl 同 @thehemanofficial 彈琴同拉琴造詣令到劇中音樂嘅生命力倍增,希望大家喺現場好好感受。 入台撞正打風加上小弟中招,support team一定辛苦到核爆,辛苦晒你哋,我一定會光速好翻,即刻狗衝翻嚟歸隊,大家加油🔥🔥