كان عندي أمل تكون الحرب خالصة بهاد اليوم ..هو مش يوم عادي أبداً اليوم عيد ميلاد ولي العهد مثل ما كان ساري مسميه اليوم ذكرى ميلاد ( دانييل ) حبيب روحي أنا وساري بكرنا ودلوعنا والمدلل واللزيز كان ساري يحكيلو مزكاك لزيز ويضحك 💔أول م انولد دانييل وسجلناه دانييل الناس كانوا يحكولوا دانيال ف كنت أزعل وحبيبي ساري كان يحكيلي خلص هاد الإسم الحركي ي عيني 💔 دانييل حبيبي صار عمرو ٣ سنوات بالتمام وهاي السنة للأسف رح تكون أسوء سنة بتمر عليه بكل حياته فقدان أبوه 💔 ابني حبيبي فقد الأمان لدرجة بس يشوف أحمد أخوي بركض عليه بحكيلو بابا 💔بنام بحضنو مثل م كان ينام مع ساري 💔 بس حبيبي أحمد كثير حنون بحاول يعوضو 💔ما حدا بعوض مكان ساري ولا حدا لكن لو شوي 💔 أنا كنت يا روحي بدي آجي تشوف دانييل وعمرو ثلاث سنوات عندك بس حكولي إنو المقبرة الشرقية بالبريج خطيرة ما بنفع حدا يروح 💔حبيبي وأنا والله بدي آجي 💔 أنا يا روحي والله بحاول قدر المستطاع أنفذ وعدك لدانييل بهاي الظروف وإن شاء الله بقدر يا حبيبي 💔أنا ما طلعت من البيت من بداية الحرب غير ٣ مرات يوم وداعك ويوم نزحت ويوم رجعت عالوسطى .. بس اليوم يا قلبي بدي أطلع عشان خاطر دانييل أعوضو جزء بسيط من غيابك بعرف ما رح أقدر بس ححاول 💔 يا حبيب الفؤاد دانييل لما حكيتلو شو بدك اليوم حكالي بدي أشوف بابا عالجنة 💔 حبيبي دانييل أنا بعرف أديش يا ماما تعبان من جواك بغياب صاحبك وحبيبك والبابا 💔 وبعرف ما بتعرف تعبر عن كل شي جواك رغم انك بتعبر يا حبيبي وذكي الله يحميك ويحفظك يا روحي 🤍..دانييل بابا كثير بحبك وكان بدو يعملك عيد ميلاد كثير بجنن ويجبلك السيارة يلي نفسك فيها اللي كان كل م ياخدك مشوار بابا ركبني بابا بدي هاي وتيجي عيونك منفخين من العياط وكان بابا يكون حاملك بالعافية وتعبان وبلهث وحكالي خلص وعد لأجبلو ياها بس يصير ثلاث سنوات بكون بفهملها أكثر وبعرف يسوقها 💔 والله يا ماما كان رح ينفذ مثل م جابلك شغلات كثير بس قدر الله كان حاضر بينا يا روحي الحمد لله 💔 يا حبيبي يا إمي بكرة بس تكبر رح تشوف هاد المنشور لو أنا كنت عايشة رح تبكي وتحضني ولو كنت ميتة رح تذكر وكون متأكد إنو بابا كان بموت عليك وبحبك كثير وبعشق الارض يلي بتمشي عليها كان يحكيلي يا أحلى اشي صارلي بحياتي ويا إم أحلى ولد جبتيلي ياه بالعالم 💔كان يحبك ويحب أختك كثير والله يا روحي .. بس روحو معك حاضرة يا قلبي لدرجة أنا بحس إنك بتشوفو لأنه بس تكون قاعد لحالك بحكيلك شو بتعمل بتقولي هاد بابا جنبي او بابا عالشباك او بابا بياكل معي أو بابا طعماني موز وتفاح 💔 #ساري_منصور_صحفي_من_غزة